Քարածուխը բուսական ծագման այրվող կարծր օգտակար հանածո է։ Ունի ածխացման ավելի բարձր աստիճան, քան գորշ ածուխը։ Գույնը սև է կամ գորշասև։ Փայլն ավելի ուժեղ է, քան գորշ ածխինը։
Պարունակում է 75-97% և ավելի ածխածին, 1,5- 7% ջրածին, 1, 5-15% թթվածին, 0, 5-4% ծծումբ, մինչև 1, 5% ազոտ, 0, 5-2% ցնդող նյութեր։ Առաջանում է բարձրակարգ բույսերի օրգանական մնացորդների քայքայումից, որոնք փոխակերպվում են երկրակեղևի ապարների ճնշման և համեմատաբար բարձր ջերմաստիճանի պայմաններում։ Հայաստանում քարածխի փոքր քանակներ կան Գեղարքունիքի, Լոռու և Շիրակի մարզերում։ Օգտագործվում է որպես կենցաղային և էներգետիկ վառելիք։ Նաև մետաղաձուլության և քիմիական արդյունաբերության համար։
